काठमाडौं ।

अघिल्लो स्थानीय निर्वाचनमा नेकपा (एमाले)का तर्फबाट बलेफी गाउँपालिका अध्यक्ष निर्वाचित भएका केदार क्षत्री पछिल्लो स्थानीय निर्वाचनमा काँग्रेस प्रवेश गरे । काँग्रेस प्रवेश गरेपनि अपेक्षा अनुसारको भूमिका पाएनन् र उनी राजनीति छाडेर पुरानै संस्था अरनिको यातायात सेवा समितिको अध्यक्ष बन्न पुगे ।

सहोदर भाई कृष्ण क्षत्रीलाई जिल्ला समन्वयको सभापति बनाउने र आफू प्रदेशसभाको निर्वाचन लड्ने योजना दुवै असफल भएका क्षत्री अहिले राजनीतिक गतिबिधिमा त्यति देखिएका छैनन् । तर, शुक्रवार उनले पुरानै पार्टी एमालेका उम्मेदवार सरेश नेपालको पोष्टर फेसबुकमा शेयर गर्न पुगे । लामोसमय एमालेमा सकृय भएका क्षत्रीले एमाले कार्यकर्ता बिनोद उपाध्यायले पोष्ट गरेको सरेश नेपालको तस्वीर र सूर्य चिन्हमा मतदान गरौं भनेर नारा लेखिएको पोष्ट शेयर गरेका हुन् ।

पालिका अध्यक्ष भएका बेला बैकिग कसुरमा माओवादी उम्मेदवार माधव सापकोटाकै पहलमा क्षत्रीबिरुद्ध मुद्धा दर्ता गराएका थिए । उनी माओवादीसँग पनि सन्तुष्ट थिएनन् । अध्यक्ष पद नै खारेज हुने गरेर मुद्धा दर्ता गराउने माओवादीप्रति क्षत्री पटक्कै सन्तुष्ट छैनन् । यो क्षेत्रमा संघीयतर्फ काँग्रेसका उम्मेदवार छैनन् । त्यसकारण पनि क्षत्रीको लगाव एमालेतर्फ देखिएको हो ।