काठमाडौं : इरानमा अमेरिकाले आक्रमणलाई तीव्रता दिएपछि खाडी क्षेत्रमा बढेको तनावका कारण त्यहाँ कार्यरत नेपाली श्रमिक र स्वदेशमा रहेका उनीहरूका परिवार त्रसित रहेका छन् ।

एक हप्तादेखि मध्यपूर्वमा तनाव बढ्दै गर्दा कुवेत, कतार, साउदी अरब र संयुक्त अरब इमिरेट्स ९यूएई० मा कार्यरत झन्डै १९ लाख नेपाली श्रमिक र उनीहरूका परिवारलाई चिन्ता थपिएको हो ।

क्षेत्रीय हवाई उडान अवरुद्ध हुँदा अबुधाबी, दुबई, दोहा र कुवेत विमानस्थलमा एक हजारभन्दा धेरै नेपाली रोकिएका छन् । खाडीमा रहेका कामदार र उनीहरूका आफन्त मनोवैज्ञानिक चिन्तामा रहे पनि नेपाल सरकारले यूएईमा एक नेपाली युवाको ज्यान गएबाहेक अन्य नेपाली सुरक्षित रहेका बताएको छ ।

श्रम, रोजगार तथा सामाजिक सुरक्षामन्त्री राजेन्द्रसिंह भण्डारीले ती देशमा रहेका दूतावासका कर्मचारीसँग निरन्तर सम्पर्क भइरहेकाले अहिलेसम्मको अवस्था हेर्दा तत्काल खतरा नदेखिएको बताएका छन् ।

परराष्ट्र मन्त्रालयको नेतृत्वमा आपत्कालीन प्रतिकार्य टोली गठन भएको छ भने खाडी क्षेत्रका १० कूटनीतिक नियोग चौबीसै घण्टा सक्रिय रहेर काम गरिरहेका छन् । सम्बन्धित दूतावासहरूले प्रभावित नेपालीलाई अनलाइन पोर्टलमा आफ्नो विवरण अद्यावधिक गर्न र संयमता अपनाउन अनुरोध गर्दै आएका छन् ।