काठमाडौं । नेपाल सरकार, मन्त्रिपरिषद्को निर्णयले नेपाल विद्युत् प्राधिकरणमा कुलमान घिसिङलाई कार्यकारी निर्देशकमा ल्याउने भएको छ । ऊर्जा मन्त्रालयको प्रस्तावमा मन्त्रिपरिषद्ले घिसिङलाई विद्युत् प्राधिकरणको कार्यकारी निर्देशकमा नियुक्त गर्ने भएको हो । ऊर्जा मन्त्रालयले घिसिङलाई फोन गरेर उनको नियुक्तिबारे जानकारी दिइसकेको एक विस्वस्त सूत्रले जनाएको छ ।

यता, वर्तमान कार्यकारी निर्देशक हितेन्द्र देव शाक्यलाई जल तथा ऊर्जा आयोगमा सरुवा गरिएको बुझिएको छ । आयोगमा विशिष्ट श्रेणी पद सिर्जना गरेर शाक्यलाई सरुवा गरिएको हो । शाक्यले अहिले खाइपाइ आएको सुविधा नघट्ने गरी आयोगमा लगिने भएको छ । शाक्यले पनि यसअघि आफूलाई अन्याय नहुने गरी अन्य जिम्मेवारी दिए जाने बताएका थिए ।
कुलमान घिसिङ नेपाल विद्युत् प्राधिकरणमा फर्कने कुराले प्राधिकरणका स्वच्छ छवि भएका कर्मचारीहरु खुसी भएको प्राधिकरणका एक कर्मचारीले बताए ।