धनगढी  । 

धनगढी प्रिमियर लिग(डिपिएल) को उपाधि घरेलु टोली टिम चौराहा धनगढीले जितेको छ। उसले काठमाडौं गोल्डेन्स्लाई २१ रनले पराजित गरेको हो। जितसँगै धनगढीले २५ लाख रुपैयाँ नगद पुरस्कारसहित ट्रफी जितेको छ।

सुनिल धमला र रोहन मुस्तफाले अर्धशतक बनाएपछि उपाधिका लागि धनगढीले काठमाडौंलाई १ सय ८२ रनको लक्ष दिएको थियाे। तर काठमाडौं ८ विकेटको क्षतिमा मात्र १ सय ६० रनमा सिमित हुन पुग्यो।

उसका लागि प्रारम्भिक ब्याट्सम्यान अमित श्रेष्ठले सर्वाधिक ५८ रनको पारी खेले। उनले ७ चौका र ३ छक्का हिर्काए। बलिङतर्फ २ विकेट लिएपनि अमितसँगै ब्याटिङ गर्न आएका सुबोथ भाटी ब्याटिङमा भने चल्न सकेनन्। उनी ५ रनको व्यक्तिगत स्कोरमा पेवेलियन फर्किए।