काठमाडौं : फिफा विश्वकप फुटबलको प्रिक्वाटरफाइनलमा आज राति ५ पटकको विजेता ब्राजिल र नर्वे खेल्दैछन् । यो खेल राति पौने २ बजे अमेरिकाको न्युयोर्क न्यु जर्सी रङ्गशालामा शुरू हुनेछ ।

नकआउट चरणमा ब्राजिलले जापानलाई र नर्वेले आइभरी कोस्टलाई समान २–१ हराउँदै अन्तिम १६ मा पुगेका हुन् । ब्राजिल समूह ‘सी’ को विजेता र नर्वे समूह ‘आई’ को उपविजेताका रूपमा नकआउटमा पुगेका हुन् ।

नर्वेले अहिलेसम्म ब्राजिलसँग खेलेका कुनै पनि खेल हारेको छैन । यी दुई टोलीबीच अहिलेसम्म ४ पटक अन्तर्राष्ट्रिय खेल भएको छ । नर्वेले सन् १९९८ को विश्वकपमा नर्वेले ब्राजिललाई २–१ ले हराएको थियो । यस्तै नर्वेले १९९७ मा भएको मैत्रीपूर्ण खेल ४–२ ले जितेको थियो भने १९९८ र २००६ को खेल १–१ को बराबरीमा सकिएको थियो ।

चौथो पटक विश्वकप खेलिरहेको नर्वे अहिलेसम्म क्वाटरफाइनल पुग्न सकेको छैन ।

विश्वकपको प्रिक्वाटरफाइनलमा भोलि बिहान पौने ६ बजे मेक्सिको र इङ्ग्ल्यान्ड खेल्दैछन् । यो खेल मेक्सिको सिटी रङ्गशालामा हुनेछ ।

नकआउटमा मेक्सिकोले इक्वेडरलाई २–० र इङ्ग्ल्यान्डले डीआर कङ्गोलाई २–१ ले हराउँदै अन्तिम १६ मा पुगेका हुन् । मेक्सिको समूह ‘ए’ र इङ्ग्ल्यान्ड समूह ‘एल’ को विजेताका रूपमा नकआउटमा पुगेका हुन् ।

विश्वकपमा यी दुई टोलीबीच दोस्रो पटक प्रतिस्पर्धा हुन लागेको हो । यसअघि सन् १९६६ को विश्वकपमा इङ्ग्ल्यान्डले मेक्सिकोलाई २–० ले हराएको थियो । यस्तै यी दुई टोलीबीच अन्य प्रतियोगितामा ८ पटक भेट हुँदा इङ्ग्ल्यान्ड ५ र मेक्सिको २ खेलमा विजयी हुँदा १ खेल बराबरीमा सकिएको छ ।