काठमाडौं । पूर्वप्रधानमन्त्री झलनाथ खनालसहितका एमाले नेताहरुले चलचित्र ‘शत्रु गते’ हेरेका छन् । मंगलबार बागबजारस्थित सिटी म्याक्स हल पुगेर खनालसहितका एमाले नेताहरुले चलचित्र हेरेका हुन् । खनालसँगै नेता भिम रावल, जीवनराम श्रेष्ठ, ठाकुर गैरे तथा माओवादी केन्द्रका नेता देवेन्द्र पौडेलले चलचित्र हेरेका हुन् ।

“एमाले नेताहहरुले चलचित्र हेर्ने इच्छा ब्यक्त गरेपछि हामीले सिटीम्याक्समा चलचित्र हेर्न ब्यवस्था मिलाएका थियौँ,” चलचित्र ‘शत्रु गते’ का निर्देशक प्रदीप भट्टराइले भने, “सिटी म्याक्सका दुइटा हल एमाले नेता तथा कार्यर्ताले भरिएका थिए ।”

खनालले चलचित्र रमाइलो रहेको प्रतिक्रिया दिएको भन्दै निर्देशक भट्टराइले भने, “उहाँले चलचित्र हेर्न थालेपछि हाँसोको फोहोरा नै रोक्न सकिएन । साइबर क्राइमको कुरा पनि उठाउनु भएको छ, जुन सकारात्मक पक्ष हो भन्नु भयो ।”

केही समय अगाडि रिलिज भएको चलचित्र ‘पञ्चायत’को प्रिमियरमा पनि खनालसहितका एमाले तथा माओवादी केन्द्रका नेताहरु पुगेका थिए । ‘पञ्चायत’ हेर्न खनालसँगै माओवादी केन्द्रका अध्यक्ष पुष्पकमल दाहाल प्रचण्ड पनि पुगेका थिए ।