काठमाडौं । सरकारले म्यान्मासँगै शुक्रबार संयुक्त अरब इमिरेट्स (युएई) बाट पनि आफ्ना नागरिकको उद्धार गरेको छ । कोरोना भाइरसको विश्वव्यापी संकटका कारण उत्पन्न असहज अवस्थामा स्वदेश आउनैपर्ने परिस्थितिमा रहेका नेपालीलाई फर्काउने क्रममा युएईमा अलपत्र परेकाका १६८ नेपालीलाई स्वदेश फर्काएको हो ।

त्रिभुवन अन्तर्राष्ट्रिय विमानस्थल नागरिक उड्डयन कार्यालयका अनुसार उनीहरु एयर अरेबियाको एविवाई-१७५१ नम्बरको जहाजमार्फत साँझ ६ः०० बजे काठमाडौँ अवतरण गरेका हुन् । जहाजमा एउटा शवसमेत ल्याइएको छ । यसअघि शुक्रबार बिहान म्यान्माको सेनाको एयरफोर्सको फोकर-६० को फ्लाइट नम्बर एमएएच–००३ बाट २६ नेपालीलाई स्वदेश फर्काएको थियो ।

कोभिड–१९ सङ्कट व्यवस्थापन केन्द्र (सिसीएमसी) को समन्वयमा प्रभावित भएका नेपालीलाई प्राथमिकताका आधारमा नेपाल ल्याउन थालिएको हो । सिसीएमसीको निर्णयअनुसार उनीहरुको आवश्यक व्यवस्थापनको जिम्मा नेपाली सेनालाई दिइएको छ

युएईबाट आएकामा प्रदेश नं १ का ४६, प्रदेश नं २ का २३, वाग्मती प्रदेशका ३७, गण्डकी प्रदेशका २३, प्रदेश नं ५ का २३, कर्णाली प्रदेशका चार र सुदूरपश्चिम प्रदेशका १२ जना रहेको बताइएको छ । उनीहरुलाई उपत्यकाको तोकिएको होल्डिङ सेन्टरमा लगिएको नेपाली सेनाले बताइको छ । सरकारले काठमाडौँको यती पार्टी प्यालेस वसुन्धरा, स्काईजन पार्टी प्यालेस सुकेधारा र कुण्डलिनी पार्टी प्यालेस वसुन्धारालाई होल्डिङ सेन्टर बनाएको छ ।