-
काठमाडौँ । नेपालमा मंगलबर थप २८८ जनामा कोरोनाभाइरस संक्रमण पुष्टि भएको छ ।
स्वास्थ्य तथा जनसंख्या मन्त्रालयको नियमित मिडिया ब्रिफिङका क्रममा मन्त्रालयका प्रवक्ता डा. विकास देवकोटाले विभिन्न प्रयोगशालामा गरिएको परीक्षणमा २८८ जना कोरोनाका नयाँ बिरामी थपिएको पुष्टि गरेका हुन् । योसँगै संक्रमितको संख्या २ हजार ९९ पुगेको छ । मंगलबर संक्रमण पुष्टि हुनेमध्ये काठमाडौँमा कार्यरत ४ जना स्वास्थ्यकर्मी पनि रहेका छन् । संक्रमितमध्ये आठ जनाको मृत्यु भइसकेको छ ।
मन्त्रालयका अनुसार रौतहटका ७४, स्याङ्जाका ५, पर्वतका ५, सप्तरीका १, बर्दियाका ३, बाँकेका १७, सुर्खेतका २७, दैलेखका ९, सल्यानका १८, अछामका १०, बाराका १, दाङका १७, प्युठानका १, कन्चनपुरका ८, कैलालीका १०, धनुषाका ६, महोत्तरीका २, सर्लाहीका २१, सिरहाका १७, भक्तपुरका १, धादिङका १, कपिलवस्तुका १६, काठमाडौं मेडिकल कलेजका ४ जना, नवलपरासी पूर्वका १, नवलपरासी पश्चिमका १, नुवाकोटका २ र रूपन्देहीका १० जना संक्रमित भएका छन् । संक्रमित हुनेमा २७० पुरुष र १८ जना महिला छन् ।
प्रवक्ता देवकोटाका अनुसार हालसम्म नेपालमा कोरोना जित्नेको संख्या २६६ पुगेको छ । मंगलबार थप ४५ जना डिस्चार्ज भएका छन् ।
मन्त्रालयका अनुसार पीसीआर विधिबाट हालसम्म ७५ हजार ३ सय ४३ र आरडीटी विधिबाट १ लाख १६ हजार ३४५ नमुना परीक्षण भएका छन् । देशभरि १ लाख ४५ हजारभन्दा बढी मानिस क्वारेन्टिनमा रहेका छन् ।
