• काठमाडौं : सिन्धुलीको गोलन्जोर गाउँपालिका–७, पलासेस्थित बीपी राजमार्गमा माइक्रोबस दुर्घटना हुँदा १४ जना घाइते भएका छन् ।

    मंगलबार दिउँसो करिब २ बजे जनकपुरबाट काठमाडौं आउँदै गरेको माइक्रोबस आफैँ अनियन्त्रित भई दुर्घटना भएको हो । म।प्र। ०४–००१ ज ०२४३ नम्बरको माइक्रोबस सडकबाट करिब २० मिटर तल अधेरी खोलाको बगरमा खसेर दुर्घटना भएको प्रहरीले जनाएको छ ।

    घाइतेहरूलाई उपचारका लागि शुभजीवन अस्पताल खुर्कोट पठाइएको छ । घाइतेमध्ये ९ जनाको विवरण खुलेको छ ।

    घाइते हुनेमा माइक्रोबस चालक धनुषाको सहिदनगर नगरपालिका–८ बस्ने दीपककुमार दास, सोही नगरपालिका–७ बस्ने १७ वर्षीया रानीकुमारी मण्डल, वडा नम्बर २ का १४ वर्षीय पियुष गोहित, १५ वर्षीय आयुष गोहित, १२ वर्षीया रुबी गोहित छन् ।

    त्यस्तै, ललितपुरको भैँसेपाटी बस्ने ३६ वर्षीया प्रियांका साह, उनकी छोरीहरू १६ वर्षीया जेनी साह र ११ वर्षीया सफलता साह र तीन वर्षीया ओमी साह छन् ।