काठमाडौं ।

नेपाल उद्योग वाणिज्य महासंघको बागमती प्रदेश अध्यक्ष पदका लागि बेदबहादुर श्रेष्ठले उम्मेदवारी दर्ता गराएका छन् । लामो समयदेखि उद्योग–व्यवसाय क्षेत्रमा सक्रिय श्रेष्ठले संगठनको विभिन्न तहमा हासिल गरेको अनुभवका आधारमा प्रदेश नेतृत्वका लागि आफू उपयुक्त पात्र भएको दाबी गरेका हुन् ।

०५८ सालदेखि महासंघमा साधारण सदस्यका रूपमा आबद्ध भएका श्रेष्ठले जिल्ला सदस्य, उपाध्यक्ष र अध्यक्ष हुँदै केन्द्रीय सदस्यको जिम्मेवारीसमेत सफलतापूर्वक निर्वाह गरिसकेका छन् । संगठनभित्रको लामो अनुभव र कार्यसम्पादनका आधारमा उनले बागमती प्रदेशको नेतृत्व सम्हाल्न सक्ने क्षमता आफूमा रहेको बताएका छन् ।

आगामी चैत २३ र २४ गते हुने बागमती प्रदेश अधिवेशनलाई लक्षित गर्दै श्रेष्ठले प्रदेश कार्यालय भवन निर्माणलाई प्राथमिकतामा राखेका छन् । साथै, उद्योगी–व्यवसायीहरूको हकहित संरक्षणका लागि ठोस योजना ल्याउने प्रतिबद्धता पनि व्यक्त गरेका छन् ।

जिल्ला, नगर, वस्तुगत तथा एसोसियट सदस्यहरूको समस्या र आवश्यकताबारे राम्रो जानकारी राख्ने श्रेष्ठ आफैं पनि उद्योगी तथा व्यवसायी भएकाले व्यावहारिक नेतृत्व दिन सक्ने विश्वास गरिएको छ ।
उद्योगी–व्यवसायीहरूको व्यापक समर्थनसहित चुनावी मैदानमा उत्रिएका श्रेष्ठले आफ्नो अनुभव र योजनामार्फत बागमती प्रदेशलाई थप सशक्त बनाउने लक्ष्य लिएका छन् । सिन्धुपाल्चोकको नेतृत्व गर्दा र वागमती प्रदेशको भूगोलका तर्फवाट केन्द्रीय सदस्य बनेका बेला गरेको श्रेष्ठको कामका आधारमा पनि उनी प्रदेश अध्यक्षका लागि योग्य रहेको सिन्धुपाल्चोक उद्योग वाणिज्य संघका अध्यक्ष बुद्धराज बस्नेतले बताए ।