काठमाडौं ।

नेपाल राष्ट्र बैंकले गत वर्षको मौद्रिक नीति मार्फत ७ सय ५३ वटै स्थानीय तहमा बाणिज्य बैंकका शाखा खोल्न निर्देशन दियो । जतिबेला २ सय ९६ स्थानीय तहमा मात्रै बाणिज्य बैंकका शाखा पुगेका थिए । त्यो निर्देशनअनुसार गत असारसम्म सबै स्थानीय तहमा बाणिज्य बैंकका शाखा पुग्नु पर्दथ्यो तर, अहिलेसम्म जम्मा ७ सय ११ स्थानीय तहमा बैंकका शाखा पुगेका छन् । शाखा कार्यालय स्थापनाका लागि उचित भवन नपाएको, सडक नपुगेको र सञ्चारको सुविधा नभएको भन्दै बैंकहरुले अहिलेसम्म ४२ स्थानीय तहमा शाखा खोल्न आनाकानी गरेका छन् ।

ग्रामीण क्षेत्रबाट उल्लेख्य मात्रामा निक्षेप संकलन नहुने ठानेर पनि बैंकहरु दुर्गम क्षेत्रमा जान अरुचि देखाएका हुन् । दुर्गमका शाखाहरुको आम्दानीले खर्चलाई जित्न अझै २ वर्ष लाग्ने बैंकरहरुको आकलन छ ।

स्थानीय सरकारले बाणिज्य बैंकबाटै कारोबार गर्नुपर्ने व्यवस्था छ । स्थानीय तहले उठाउने कर, वितरण गर्ने सेवा र परिचालन गर्ने बजेटको आकार बढ्दै जाादा बैंकले पर्याप्त कारोबार बढाउन सक्छन् । त्यसैले तत्कालको नाफा नहेरी बैंकहरुले सबै तहसम्म पुग्ने तत्परता देखाउने हो भने दूरगामी रुपमा फाइदा नै पुर्याउनेछ ।