काठमाडौं । बिहीबार काठमाडौं उपत्यकामा ८७ जना कोरोना संक्रमित थपिएको स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमले पुष्टि गरेका छन् । उनका अनुसार काठमाडौंमा ७६, ललितपुरका १० र भक्तपुरका १ जना रहेका छन् । मन्त्रालयको दैनिक कोरोना अपडेटमा मुलुकभरबाट पछिल्लो २४ घण्टामा ३६० जना कोरोना संक्रमित थपिएको प्रवक्ता डा. गौतमले बताए । यीसँगै नेपालमा कोरोना संक्रमितको कुल संख्या २१ हजार ७५० पुगेको छ ।

पछिल्लो २४ घण्टामा थप २३३ जना कोरोनामुक्त भई डिस्चार्ज भएसँगै अहिलेसम्म कोरोना जित्नेको संख्या १५ हजार ३८९ पुगेको मन्त्रालयले बताएको छ । मन्त्रालयका अनुसार कोरोनाकै कारण हालसम्म मृत्यु हुनेको संख्या ६५ पुगेको छ । त्यसैगरी अहिले देशभरि विभिन्न स्थानमा क्वारन्टीनमा बस्नेको संख्या ९ हजार ४७० पुगेको छ । पछिल्लो २४ घण्टाको अवधिमा ६ हजार ६२२ जनाको पिसिआर परीक्षण भएको र यससँगै नेपालमा अहिलेसम्म ४ लाख १९ हजार बढीको पिसिआर परीक्षण भएको छ ।