एटलान्टिक महासागरमा यात्रा गरिरहेको एउटा पानीजहाजमा हान्टा भाइरस सङ्क्रमण फैलिएको घटनाले अन्तर्राष्ट्रिय चासो बढिरहेका बेला विश्व स्वास्थ्य सङ्गठन (डब्ल्यूएचओ) ले सर्वसाधारणमा यसको जोखिम अत्यन्त कम रहेको जनाएको छ ।

डब्ल्यूएचओले यो भाइरस सामान्य रूपमा सजिलै नसर्ने र मुख्यतः अत्यन्त नजिकको सम्पर्कबाट मात्र फैलिने भएकाले व्यापक महामारीको खतरा नरहेको बताएको अन्तर्राष्ट्रिय समाचार संस्था एएफपीले जनाएको छ ।

डब्ल्यूएचओका प्रवक्ता क्रिश्चियन लिन्डमेयरले स्विट्जरल्यान्डको जेनेभामा आयोजित नियमित पत्रकार सम्मेलनमा हान्टा भाइरस गम्भीर र घातक हुन सक्ने भए पनि यसको सङ्क्रमण क्षमता सीमित रहेको बताउनुभयो । उहाँका अनुसार यो भाइरस सङ्क्रमित व्यक्तिको अत्यन्त नजिकमा लामो समय बस्ने मानिसहरूमा मात्र सर्ने सम्भावना धेरै हुन्छ ।

अर्जेन्टिनाको उशुआइयाबाट केप भर्डेतर्फ जाँदै गरेको बेलायती पानीजहाज ‘एमभी होन्डियस’ मा देखिएको सङ्क्रमणले विभिन्न देशका स्वास्थ्य निकायलाई सतर्क बनाएको छ ।

जहाजमा अहिलेसम्म तीन जनाको ज्यान गइसकेको छ भने डब्ल्यूएचओको पछिल्लो विवरणअनुसार पाँच जनामा सङ्क्रमण पुष्टि भएको छ । थप तीन जनामा सङ्क्रमणको आशङ्का गरिएको छ र उनीहरूको परीक्षण तथा निगरानी भइरहेको खबरमा उल्लेख छ ।

जहाजमा सङ्क्रमण कसरी शुरू भयो भन्नेबारे अनुसन्धान चलिरहेको छ । स्वास्थ्य अधिकारीहरूले यात्रुहरूको गतिविधि, उनीहरूको सम्पर्क इतिहास तथा जहाजमा रहेका सम्भावित सङ्क्रमण स्रोतबारे अध्ययन गरिरहेका छन् ।

डब्ल्यूएचओले सदस्य राष्ट्रहरूलाई सतर्क रहन आग्रह गरे पनि तत्काल अन्तर्राष्ट्रिय यात्रा प्रतिबन्ध आवश्यक नरहेको जनाएको छ । सङ्गठनले तथ्यमा आधारित स्वास्थ्य सतर्कता अपनाउन र अफवाह तथा अतिरञ्जित सूचना फैलिन नदिन पनि आग्रह गरेको छ ।