पर्सा । प्रदेश नम्बर २ का मुख्यमन्त्री लालबाबु राउतले प्रादेशिक प्रहरी भर्ना गर्न प्रदेशसभाबाट निर्णय गरी सहमतिका लागि संघलाई पठाइएको बताएका छन्।

दुई हजार ६१७औं महावीर जयन्तीका अवसरमा बिहीबार आयोजित कार्यक्रममा मुख्यमन्त्री राउतले संघीय सरकारको सहमतिपछि प्रादेशिक प्रहरी भर्ना सुरु हुने बताए। उनले प्रदेश सकारले प्रहरी भर्ना गरेपछि अपराध न्यून भई सुशासन कायम हुने जिकिर गरे।

सो अवसरमा प्रदेश २ का भौतिक पूर्वधार तथा योजनामन्त्री जितेन्द्र सोनलले वर्ग, क्षेत्र र जात/जातिबीचको विभेद हटाउँदै राजनीतिक रुपमा सबै नागरिकलाई समान अधिकार दिए मुलुकमा दिगो शान्ति कायम हुने बताए।

पर्साको ठोरीलाई ३ नम्बर प्रदेशमा मिलाउने भनी सो प्रदेशका मुख्यमन्त्री डोरमणि पौडेलले व्यक्त गरेको भनाइको प्रतिवाद गर्दै मन्त्री सोनलले पर्सा जिल्लाको एक इञ्च भूभाग पनि कसैलाई नदिइने प्रस्ट पारे। (रासस)