विराटनगर । संघीय मामिला तथा सामान्य प्रशासनमन्त्री लालबाबु पण्डितले स्थानीय तहका प्रमुख पदका लागि ९५ प्रतिशत कर्मचारी पठाइसकिएको र उनीहरुले आफ्नो कार्य गरिरहेको बताएका छन् । बाँकी रहेका पदमा पनि कर्मचारी जेठ मसान्तसम्म आ–आफनो कार्य क्षेत्रमा पुग्ने उल्लेख गरे। मन्त्री पण्डितले कर्मचारीका सम्बन्धमा प्रस्तावित संघीय निजामती विधेयक कानून मन्त्रालय पुगेको जानकारी दिँदै निजामतीमा धेरै कर्मचारी संगठन आवश्यक नरहेको र एउटा निर्वाचित कर्मचारी संगठन मात्र हुनुपर्ने धारणा राखे।

उनले स्वेच्छिक अवकास हाल स्थगित रहेको जानकारी दिँदै नियमित रुपमा अहिलेसम्म २ हजार कर्मचारीले अवकास लिएको र बाँकीले आफ्नो कार्य प्रारम्भ गरिसकेको जानकारी दिए।

प्रदेशमा कर्मचारीको पदपूर्तिका लागि आवश्यक प्रादेशिक लोकसेवा आयोग निर्माण भई सोहीअनुसार हुने बताउँदै उनले अहिले आवश्यक रहेका केही प्राविधिक पदमा कर्मचारी राख्न सकिने धारणा व्यक्त गरे।