काठमाडौं : परराष्ट्रमन्त्री शिशिर खनालले मध्यपूर्वको द्वन्द्वका कारण उत्पन्न परिस्थिति र त्यसले नेपालको अर्थतन्त्रमा पारेको बहुआयामिक प्रभावबारे जानकारी गराएका छन् ।

संसद् भवन परिसरमा आज सञ्चारकर्मीसँग कुरा गर्दै मन्त्री खनालले द्वन्द्व प्रभावित क्षेत्रमा रहेका नेपालीको अवस्था बुझ्न मन्त्रालयले तथ्याङ्क सङ्कलन गरिरहेको र अहिलेसम्म ८८ हजारभन्दा धेरै नेपालीले आफ्नो विवरण टिपाएका जानकारी दिए । मन्त्रालयमा सञ्चालित चौबीसै घण्टाको हटलाइनमा सुरूका दिनको तुलनामा अहिले फोन आउने क्रम घटेको उनको भनाइ छ ।

नेपालीको सहजताका लागि नेपाल एअरलाइन्सले दुबईमा नियमित उडान सुरू गरिसकेको र साउदी अरेबियामा पनि उडान भइरहेको मन्त्री खनालले जानकारी दिए । बहराइन र कुवेतजस्ता सीधा उडान नभएका ठाउँबाट आउन चाहनेहरूलाई साउदीसम्म ल्याएर त्यहाँबाट नेपाल पठाउने गरी सहजीकरण भइरहेको छ ।