भारत र अमेरिकाले आउँदो १० वर्षमा रक्षा सहयोग विस्तार गर्न एक रूपरेखा सम्झौतामा हस्ताक्षर गरेका छन् । अमेरिकी रक्षा सचिव पिट हेगसेथ र भारतीय रक्षामन्त्री राजनाथ सिंहबीच मलेशियाको क्वालालम्पुरमा भएको बैठकपछि यो सम्झौताको घोषणा भएको बीबीसीले जनाएको छ ।

यो सम्झौताले समन्वय, सूचना आदानप्रदान र प्राविधिक सहयोग बढाउनुका साथै क्षेत्रीय स्थिरता र प्रतिरोधलाई अगाडि बढाउने अमेरिकी रक्षा सचिव हेगसेथले सामाजिक सञ्जाल ‘एक्स’ मार्फत बताएका छन् ।

यस्तै भारतीय रक्षामन्त्री राजनाथ सिंहले यो सम्झौताले दुई देशबीचको पहिले नै बलियो रक्षा साझेदारीमा नयाँ युगको शुरुआत गर्ने ‘एक्स’ मा उल्लेख गरेका छन् ।

दुई देशबीच बढ्दो रणनीतिक सहकार्यलाई बलियो बनाउने उद्देश्यले गरिएको यो सम्झौताले भारत–अमेरिका रक्षा सम्बन्धलाई नयाँ युगतर्फ अग्रसर गराउने खबरमा उल्लेख छ । भारत र अमेरिकाले आफ्नो रक्षा सम्बन्धलाई निरन्तर बढाउँदै लगेका छन् ।

अमेरिकी राष्ट्रपति डोनाल्ड ट्रम्पले भारतमाथि ५० प्रतिशत भन्सार शुल्क लगाएपछि दुई देशले व्यापार सम्झौता गर्ने र तनावपूर्ण सम्बन्धलाई अन्त्य गर्ने प्रयास गरिरहेका बेला रक्षा सम्झौता भएको हो । यसमा रुसी तेल र हतियार खरिद गर्दा भारतले बेहोरिरहेको २५ प्रतिशत जरिवाना पनि समावेश छ ।