काठमाडौं । प्रधानमन्त्री सुशीला कार्कीले वर्तमान सरकारको प्रमुख प्राथमिकता तोकिएको समयमा चुनाव सम्पन्न गराउनु रहेको बताएकी छिन् ।

नेपालमा रहेका विभिन्न देशका राजदूत तथा कूटनीतिक नियोग प्रमुखसँग सिंहदरबारमा आज भएको सामूहिक भेटका क्रममा उनले आफू नेतृत्वको अन्तरिम सरकारको प्राथमिकताबारे ब्रिफिङ गरिन् ।

परराष्ट्रमन्त्रीको समेत कार्यभार सम्हालिरहनु भएकी प्रधानमन्त्री कार्कीले नेपालको विदेश सम्बन्ध र त्यसका नीतिका बारेमा पनि आफ्नो धारणा राखेकी परराष्ट्र मन्त्रालयका प्रवक्ता लोकबहादुर पौडेल क्षेत्रीले जानकारी दिए ।

त्यस अवसरमा प्रधानमन्त्री कार्कीले चुनावमा आवश्यक सहयोगको अपेक्षा गरेको पनि बताएकी छिन् । उनले आउँदो फागुन २१ गतेको चुनावमा अन्तर्राष्ट्रिय पर्यवेक्षक परिचालन र विदेशमा रहेका सबै नेपाली नागरिकलाई मतदानमा भाग लिन लगाउने विषयमा पनि आफूले छलफल गरिरहेको कुरा राजदूतहरूसँग गरेकी परराष्ट्र मन्त्रालयले जनाएको छ ।

प्रधानमन्त्री कार्कीसँगको भेटमा नेपालमा रहेको विभिन्न देशका राजदूत र कूटनीतिक नियोगका प्रतिनिधिको सहभागिता रहेको थियो ।