दुई वर्षदेखि प्यालेस्टिनी विद्रोही समूह हमासको कब्जामा रहेका कञ्चनपुरका विपिन जोशी जीवितै फर्कने आशा अन्त्य हुँदै गएको छ । हमासले हिजो विपिन र तीन इजरायलीको भनेर चार शव इजरायललाई बुझाएको त्यहाँका सञ्चारमाध्यमले जनाएका छन् ।

हमास समूहले दक्षिणी गाजा क्षेत्रबाट रेडक्रसको अन्तर्राष्ट्रिय समिति आइसीआरसीमार्फत इजरायली सेनालाई शव बुझाएको खबरमा उल्लेख छ । त्यहाँको सैनिक अस्पतालमा डीएनए परीक्षणपछि मात्रै शवको पुष्टि हुनेछ । हमासले विपिनसहितको शव बुझाएको भनेर इजरायली सञ्चारमाध्यमहरुले उल्लेख गरे पनि नेपाल सरकारले यसबारे आधिकारिक जानकारी दिएको छैन ।

परराष्ट्र मन्त्रालयले हिजो विज्ञप्ति निकालेर हमास समूहको कब्जामा रहेका नेपाली विद्यार्थी विपिन जोशीको अवस्था अज्ञात रहेको जनाएको छ । मन्त्रालयका अनुसार हिजो बिहान इजरायली सेना ९आइडीएफ० ले इजरायलका लागि नेपाली राजदूत, विपिनका दाजु, आमा, बहिनी, इजरायली परराष्ट्र मन्त्रालय र इजरायली प्रधानमन्त्री कार्यालयका अधिकारीसहितको भर्चुअल बैठक गरेको थियो ।

बैठकमा इजरायली सेनाले रिहा हुने बन्दीमा जोशीको नाम समावेश नभएको र उहाँको अवस्था अज्ञात रहेको जानकारी दिएको थियो । हमासको कब्जामा रहेका सबै जीवित बन्दीको रिहाइ र मृतक बन्दीको शव हस्तान्तरण प्रक्रिया पूरा नभएसम्म मन्त्रालयले यस विषयमा निरन्तर जानकारी अद्यावधिक गर्ने विज्ञप्तिमा उल्लेख छ ।