अमेरिकी राष्ट्रपति डोनाल्ड ट्रम्पले टर्कीलाई रूसबाट तेल आयात नगर्न आग्रह गरेका छन् । टर्कीका राष्ट्रपति रिसेप तैयप एर्दोगानसँगको भेटमा ट्रम्पले यस्तो आग्रह गरेको बीबीसीले जनाएको छ । युक्रेनमाथि आक्रमण गरिरहँदासम्म रूसी ऊर्जा आम्दानीलाई नोक्सान पुर्याउने उद्देश्यसहित ट्रम्पले यस्तो अपील गरेको खबरमा भनिएको छ ।

अहिले टर्की पनि भारत र चीनसँगै रूसको सबैभन्दा ठूलो ऊर्जा ग्राहकमध्ये एक हो । यो वर्षको शुरूमा टर्की हुँदै युरोप पुगेको रूसी ग्यासको मात्रा २६ प्रतिशतले बढेको तथ्याङ्क देखिन्छ । अमेरिकामा भएको राष्ट्रसङ्घको महासभामा ट्रम्पले नाटो साझेदार राष्ट्रहरूलाई रूसबाट ऊर्जा खरिद गरेर आफ्नै विरुद्धको युद्धलाई पोषण गरिरहेको समेत आरोप लगाएका थिए। उनले रुसमाथि कडा प्रतिबन्ध लगाउने संकेत समेत गरेका खबरमा उल्लेख छ ।