काठमाडौं : नेकपा माओवादी केन्द्रका अध्यक्ष एवम् पूर्वप्रधानमन्त्री पुष्पकमल दाहाल प्रचण्डले सय दिनमा सरकार असफल भए पनि तत्काल आफू सरकार ढाल्ने पक्षमा नरहेको बताएका छन् । उनले सरकार ढाल्नतर्फ लाग्दा फेरि नागरिकमा हैरानी हुने उल्लेख गरे ।

न्युज एजेन्सी नेपालसँगको कुराकानीमा प्रचण्डले आफूले सरकारलाई पटक पटक राष्ट्र र नागरिकप्रति अझ गम्भीर र संवेदनशील होस् र सकारात्मक काम गरेर जाओस् भन्ने आग्रह गरे पनि भ्रष्टाचारीलाई जोगाउनेबाहेक काम गर्न नसकेको बताए ।

उनले भने, ‘सय दिनसम्मको काम हेर्दा यो सरकार सफल भएको मान्न सकिँदैन । सरकार असफल नै छ । मैले सरकारलाई राष्ट्र र नागरिकप्रति अझ गम्भीर र संवेदनशील होस्, सकारात्मक काम गरेर जाओस् भनेको छु । यो सरकार अहिले नै ढाल्नुपर्छ भन्ने मेरो र माओवादी केन्द्रको मनशाय छैन । सरकार ढाल्नतिर लागेर नागरिकलाई हैरानी दिन मन छैन ।’