काठमाडौं । सरकार बिरुद्ध प्रहार गर्न नसकेको प्रतिपक्षी काँग्रेसलाई कर्मचारी गतिलो सहारा भएको छ । । नेपाली कांग्रेसले ‘कर्मचारी समायोजन अध्यादेश, २०७५’ माथि अस्विकार प्रस्ताव दर्ता गराएको छ। र आफू निकट कर्मचारीलाई सडकमा उतारेको छ । सरकारले संसदमा दर्ता गराएको अध्यादेशमाथि कांग्रेस नेता गगन थापाले अस्विकार गरियोस् भन्ने प्रस्ताव दर्ता गराएका हुन्।

थापासँगै नेपाल मजदुर किसान पार्टीका सांसद प्रेम सुवालले पनि अध्यादेशको विपक्षमा प्रस्ताव दर्ता गराएका छन्। प्रमुख प्रतिपक्षी दल नेपाली काँग्रेस निकट नेपाल निजामती कर्मचारी युनियनले ‘कर्मचारी समायोजन अध्यादेश’को विरोधमा सोमबार काठमाडौंमा प्रर्दशन गरेका छन्।

आफूहरुलाई बेवास्ता गरेर ल्याइएको सो अध्यादेश मान्य नहुने चेतावनी दिँदै आएको युनियनले सोमबार काठमाडौंको माइतीघर मण्डलामा सरकारविरुद्ध प्रर्दशन गरेको हो।

कर्मचारीहरुको वृत्ति विकास समेत रोकिने गरी सो अध्यादेश सरकारले ल्याएकाले विरोधमा सडक प्रर्दशन गर्नु परेको युनियनका अध्यक्ष गोपालप्रसाद पोखरेलले जानकारी दिए। एकलौटी ढंगले सरकारले ल्याएको कर्मचारी समायोजन प्रक्रियामा सहभागी हुँदैनौं,पोखरेलले चेतावनी दिए।

युनियनले सरकारले ल्याएको लेखा परीक्षणसम्बन्धि विधेयकको विरोध गर्ने लेखा परीक्षकको निर्णयप्रति पनि ऐक्यबद्धता जनाएको छ।

अध्यक्ष पोखरेलले संविधान विपरीत हुनेगरी सरकारले निजामती सेवा ऐन ल्याएको दाबी गर्दै आपत्ति पनि जनाए।

विरोध प्रर्दशनमा कर्मचारीहरुको सेवा र सर्तसम्बन्धि प्रावधान कुल्चने काम कर्मचारी समायोजनको नाममा गरिरहेको भन्दै सरकारविरुद्ध चर्का नाराबाजी समेत गरिएको थियो।