• काठमाडौं । गएको २४ घण्टामा थप २ हजार ७ सय ३६ जनामा कोरोनाभाइरस संक्रमण देखिएको स्वास्थ्य तथा जनसंख्या मन्त्रालयले पुष्टि गरेको छ । मन्त्रालयले सार्वजनिक गरेको विवरण अनुसार यीसँगै नेपालमा कोरोना संक्रमितको कुल संख्या १ लाख ९९ हजार ७ सय ६० पुगेको छ । त्यस्तै यसै अवधिमा थप २२ जनाको कोरोना संक्रमणबाट मृत्यु भएको मन्त्रालयको तथ्यांकमा उल्लेख गरिएको छ । यसरी अहिलेसम्म कोरोनाकै कारण ज्यान गुमाउनेको कुल संख्या १ हजार १ सय ४८ पुगेको छ ।

    आज थपिने नयाँ संक्रमितमा काठमाडौं उपत्यकाबाट मात्रै १ हजार ४ सय २० जना रहेको मन्त्रालयले जानकारी दिएको छ । जसमा ६ सय ३ महिला र ८ सय १७ पुरुष रहेका छन् । यसरी थपिनेमा काठमाडौंमा १ हजार १ सय ४१, ललितपुरमा १ सय ९३ र भक्तपुरमा ८६ जना संक्रमित भएका हुन् ।

    मन्त्रालयले विवरण अनुसार कुल संक्रमितमध्ये अहिलेसम्म कोरोनामुक्त हुनेको संख्या १ लाख ६० हजार ५ सय ७७ जना पुगेको छ भने मंगलबारमात्रै थप ८ सय ५३ कोरोनामुक्त भएर डिस्चार्ज भएका छन् । बाँकी सक्रिय संक्रमितको संख्या ३८ हजार ३५ जना पुगेको मन्त्रालयले विवरणमा जनाएको छ । त्यसैगरी कोरोनाको आशंकामा हाल १ हजार ५८ जना क्वारेन्टाइनमा रहेका छन् ।