• काठमाडौं । बिहीबार देशभरमा ३ हजार ७४९ जनामा कोरोना संक्रमण देखिएको छ । स्वास्थ्य तथा जनसंख्या मन्त्रालयको नियमित आयोजित कोभिड–१९ अपडेटका क्रममा प्रवक्ता डा. जागेश्वर गौतमले थपिएका उक्त संख्याको पुष्टि गरेका हुन् । यीसँगै अहिलेसम्म नेपालमा कोरोना संक्रमितको कुल संख्या १ लाख २१ हजार ७४५ पुगेको छ । उनका अनुसार २४ घण्टाको अवधिमा १६ हजार ५९८ वटा नमूनाको पीसीआर परीक्षण भएका छन् ।

    अहिले देशभरी सक्रिय संक्रमितको संख्या हालसम्म ३६ हजार ५३३ पुगेको सो अवसरमा प्रवक्ता डा. गौतमले जानकारी दिए । यीमध्ये संस्थागत आइसोलेसनमा १२ हजार ३३९ र होम आइसोलेसनमा २४ हजार १९४ जना रहेका छन् ।

    मन्त्रालयका अनुसार यस अवधिमा ३ हजार ५६४ जना कोरोनामुक्त भएर डिस्चार्ज भएका छन् । यीसँगै अहिलेसम्म कुल संक्रमितमध्ये ८४ हजार ५१८ जना निको भएर घर फर्किएका छन् । त्यसैगरी कोरोनाबाट थप १९ जनाको मृत्यु भएको छ । यसरी अहिलेसम्म कोरोनाकै कारण ज्यान गुमाउनेको संख्या ६९४ पुगेको मन्त्रालयको अद्यावधिक विवरणमा उल्लेख गरिएको छ ।