• काठमाडौं । नेपालमा मंगलबार ३ हजार ५५६ जनामा कोरोना भाइरस संक्रमण देखिएको स्वास्थ्य तथा जनसंख्या मन्त्रालयले जानकारी दिएको छ । मंगलबार आयोजित कोभिड–१९ मिडिया ब्रिफिङमा मन्त्रालय प्रवक्ता डा. जागेश्वर गौतमले थपिएको उक्त संख्याको पुष्टि गरेका हुन् । उनका अनुसार २४ घण्टाको अवधिमा १५ हजार ५७७ वटा नमुनाको परीक्षण भएको थियो । यसरी अहिलेसम्म नेपालमा कोरोना संक्रमितको कुल संख्या १ लाख १५ हजार ३ सय ५८ पुगेको छ ।

    आज थपिने नयाँ संक्रमितमा काठमाडौं उपत्यकाका मात्र २१ सय २९ जना रहेका छन् । जसमध्ये काठमाडौंका १७ सय ४६, ललितपुरका २ सय १६ र भक्तपुरका १ सय ६७ जना रहेको प्रवक्ता गौतमले सो अवसरमा जनाए ।

    मन्त्रालयको अनुसार मंगलबारमात्र थप १ हजार ५०३ डिस्चार्ज भएका छन् । यीसहित अहिलेसम्म कोरोनामुक्त हुनेको संख्या संख्या ७८ हजार ७८० पुगेको छ । त्यस्तै बाँकी सक्रिय संक्रमितको संख्या ३५ हजार ९१५ पुगेको छ भने कुल संक्रमितमध्ये हालसम्म ६ सय ६३ जनाको मृत्यु भएको छ । २४ घण्टाको अवधिमा थप १८ जनाको मृत्यु भएको मन्त्रालयले पुष्टि गरेको छ । अहिले यस्तै देशभरका क्वारेन्टाइनमा ४ हजार ७९५ जना रहेका छन् ।