• काठमाडौं । विगत २४ घण्टामा ४ हजार ४७ जनामा कोरोना भाइरस (कोभिड–१९) संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ । मन्त्रालयले आयोजना गरेको कोभिड १९ अपडेटका क्रममा प्रवक्ता डा. जागेश्वर गौतमले यस अवधिमा १४ हजारभन्दा बढी नमूनाको पीसीआर परीक्षण भएकोमा त्यसमध्ये ४ हजार ४७ जनामा कोरोना संक्रमण पुष्टि भएको जानकारी दिएका हुन् । यीसँगै नेपालमा कोरोना संक्रमितको कुल संख्या अहिलेसम्म एक लाख ११ हजार ८०२ पुगेको छ ।

    त्यसैगरी यसै अवधिमा थप १ हजार ४७३ जना कोरोनामुक्त भएका छन् । यसरी अहिलेसम्म कोरोना जितेर निको हुनेको संख्या ७७ हजार २७७ पुगेको सो अवसरमा प्रवक्ता डा. गौतमले बताए । उनका अनुसार यो कुल संक्रमितमध्ये निको हुने दर ६९ प्रतिशत हो । बाँकी सक्रिय संक्रमितको संख्या ३३ हजार ८८० पुगेको छ । तीमध्ये संस्थागत आइसोलेसनमा १३ हजार ९२३ र होम आइसोलेसनमा १९ हजार ९५७ जना रहेका छन् ।

    मन्त्रालयका अनुसार सोमबारसम्म नेपालमा कोरोनाबाट ज्यान गुमाउनेको संख्या ६४५ पुगेको छ। २४ घण्टाको अवधिमा थप ९ जनाको कोरोना संक्रमणबाट मृत्यु भएको मन्त्रालयले पुष्टि गरेको छ । त्यस्तै देशभरका क्वारेन्टाइनमा रहनेको संख्या ४ हजार ८३१ जना रहेका छन् ।