-
काठमाडौं : कृषि, वन तथा पर्यावरणमन्त्री गीता चौधरीले लामो समयदेखि सम्पर्कविहीन रहेका कर्मचारी हटाउने कामको सुरुआत गरेकी छिन् ।
नेपाल कृषि अनुसन्धान परिषद् (नार्क) को अध्यक्षसमेत रहेकी चौधरीले लामो समयदेखि कार्यालयमा अनुपस्थित रहेका २ जना कर्मचारीलाई सेवाबाट हटाएर सम्पर्कविहीन हुने कर्मचारीमाथि कारबाही सुरु गरेकी हुन्।
सेवाबाट हटाएका कर्मचारीमा कृषि अनुसन्धान निर्देशनालय सुनसरीमा कार्यरत प्राविधिक अधिकृत छैटौँ पार्वती जोशी र राष्ट्रिय जैविक प्रविधि अनुसन्धान केन्द्र ललितपुरको खुमलटारमा कार्यरत वैज्ञानिक एस–१ नमिता भट्टराई छिन्।
मन्त्री चौधरीले दरबन्दी मात्र ओगटेर सम्बन्धित कार्यालयमा उपस्थित भई जिम्मेवारी पूरा नगर्ने कर्मचारीविरुद्ध आवश्यक कारबाही गरिएको बताइन् । अब मन्त्रालयअन्तर्गत रहेका विभाग, केन्द्रलगायत निकायहरूबाट सम्पर्कविहीन रहेका कर्मचारी पनि हटाउने उनको भनाइ छ ।
