विश्वभर व्यावसायिक अन्तरिक्ष उद्योग तीब्र गतिमा विकास हुँदै गर्दा चीनले पनि यस क्षेत्रमा उल्लेखनीय प्रगति गरेको छ । चीनको लङ मार्च–१२ बी रकेटको परिक्षण हिजो सफलत भएसँगै चीन व्यावसायिक रकेट कार्यक्रममा बलियो बनेको देखिएको हो ।

लङ मार्च–१२ बी रकेट चाइना एयरोस्पेस साइन्स एन्ड टेक्नोलोजी कर्पोरेसनअन्तर्गतको व्यावसायिक रकेट निर्माण कम्पनीले विकास गरेको नयाँ पुस्ताको पुनः प्रयोगयोग्य रकेट हो । यो रकेट विशेष गरी न्यून–पृथ्वी कक्ष अर्थात् लो अर्थ अर्बिटका उपग्रह तैनाथ गर्न डिजाइन गरिएको हो । यस रकेटमा २० टनसम्म तौल बोक्ने क्षमता छ ।

कम्पनीका अनुसार परीक्षणले रकेटको डिजाइनको सम्भाव्यता र विश्वसनीयता पूर्ण रूपमा पुष्टि गरेको छ । पछिल्ला वर्षहरूमा अमेरिकाको स्पेसएक्स र ब्लू ओरिजिनजस्ता निजी कम्पनीहरूले व्यावसायिक अन्तरिक्ष उद्योगमा सफलता पाइसकेका छन् ।

चीनले पनि आफ्नो व्यावसायिक रकेट कार्यक्रमलाई प्राथमिकतामा राख्दै आएको छ । सेरेस–१ जस्ता ठोस इन्धन प्रयोग गर्ने साना व्यावसायिक रकेटहरू लागत प्रभावी र छिटो तयार हुने भएकाले सानो उपग्रह प्रक्षेपणमा लोकप्रिय बनेका छन् ।

विश्वको व्यावसायिक अन्तरिक्ष उद्योग सन् २०४० सम्ममा एक खर्ब अमेरिकी डलर नाघ्ने अनुमान गरिएको छ । बढ्दो बजारमा चीनको सक्रियताले अन्तरिक्ष क्षेत्रमा प्रतिस्पर्धा अझ बढाउने देखिएको छ ।