काठमाडौं : रुसले एक दशकभित्र चन्द्रमामा आणविक ऊर्जा प्लान्ट बनाउने योजना बनाएको छ । रुसले आफ्नो चन्द्रमा अन्तरिक्ष कार्यक्रम र संयुक्त रुसी–चिनियाँ अनुसन्धान स्टेशनलाई आपूर्ति गर्न अर्को दशकमा चन्द्रमामा आणविक ऊर्जा प्लान्ट राख्ने योजना बनाएको समाचार संस्था रोयटर्सले जनाएको छ ।

सन् १९६१ मा सोभियत अन्तरिक्षयात्री युरी गागारिन अन्तरिक्षमा जाने पहिलो मानव बनेदेखि नै रुसले अन्तरिक्ष अन्वेषणमा अग्रणी शक्तिका रूपमा आफूलाई गर्व गर्दै आएको छ तर पछिल्ला दशकहरूमा अमेरिका र चीनभन्दा पछाडि परेको छ ।

सन् २०२३ को अगस्टमा रुसको मानवरहित मानवरहित ‘लुना–२५’ मिसन चन्द्रमाको सतहमा अवतरण गर्ने क्रममा दुर्घटनाग्रस्त हुँदा महत्त्वाकाङ्क्षी योजनामा ठूलो धक्का लागेको थियो ।

रुसको राज्य अन्तरिक्ष निगम ‘रोस्कोसमोस’ ले सन् २०३६ सम्ममा चन्द्रमामा ऊर्जा संयन्त्र निर्माण गर्ने योजना बनाएको र यसका लागि ‘लाभोचकिन एसोसिएशन एयरोस्पेस’ कम्पनीसँग सम्झौतामा हस्ताक्षर गरेको विज्ञप्तिमा उल्लेख गरेको छ ।

रोस्कोसमोसले प्लान्टको उद्देश्य रुसको चन्द्र कार्यक्रमलाई ऊर्जा प्रदान गर्नु रहेको बताएको छ जसमा रोभर, एक वेधशाला र संयुक्त रुसी–चिनियाँ अन्तर्राष्ट्रिय चन्द्र अनुसन्धान स्टेशनको पूर्वाधार समावेश छ ।

रोस्कोसमोसले प्लान्ट आणविक हुनेछ भनेर स्पष्ट रूपमा बताएको छैन तर यसले सहभागीहरूमा रुसी राज्य आणविक निगम ‘रोसाटोम’ र रुसको अग्रणी आणविक अनुसन्धान संस्थान ‘कुर्चाटोभ इन्स्टिच्युट’ समावेश रहेको बताएको छ ।

रोस्कोसमोसका प्रमुख दिमित्री बाकानोभले गएको जुनमा निगमको एउटा उद्देश्य चन्द्रमामा आणविक ऊर्जा केन्द्र स्थापना गर्नु र शुक्र ग्रहको अन्वेषण गर्नु रहेको बताएका थिए ।