काठमाडौं । चीन सरकारले नेपाल अनुदानमा उपलब्ध गराएको कोभिड–१९ विरुद्धको खोप आज आइपुगेको छ । नेपाल वायुसेवा निगमको जहाजबाट कोभिड–१९ विरुद्धको खोप ‘भेरोसेल’ आज काठमाडौं आइपुगेको छ ।

चीन सरकारको सिनोफार्म अन्तर्गतको बेइजिङ इन्स्टिच्युट अफ बायोलोजिकल प्रडक्ट कम्पनीले उत्पादन गरेको ‘भेरोसेल’ खोपको ८ लाख डोज नेपाललाई अनुदानमा उपलब्ध गराएको हो । त्रिभुवन अन्तर्राष्ट्रिय विमानस्थल स्वास्थ्य तथा जनसङ्ख्यामन्त्री हृदयश त्रिपाठीलाई नेपालका लागि चिनियाँ राजदूत होउ यान्छीले खोप हस्तान्तरण गरेकी हुन् । उक्त खोपलाई टेकुस्थित स्वास्थ्यसेवा विभागको चिस्यान केन्द्रमा राखिने छ ।

उक्त खोपलाई दुई देखि ८ डिग्री सेल्सियसमा भण्डारण गर्न सकिन्छ । भेरोसेल खोपलाई विश्व स्वास्थ्य सङ्गठन (डब्लुएचओ) ले अनुमति दिन बाँकी रहेको छ । चीन सरकारले खोपको अनुमति प्राप्तका लागि डब्लुएचओमा निवेदन दिइसकेको छ । भेरोसेल खोप ८० प्रतिशतभन्दा बढी प्रभावकारी रहेको बताइएको छ ।

चीन सरकारबाट प्राप्त खोप कसलाई र कहिलेदेखि लगाउने भन्ने कुरामा सरकारले चाँडै निर्णय गर्ने स्वाथ्यमन्त्री त्रिपाठीले बताए ।