धनुषाको बटेश्वर गाउँपालिकाका अध्यक्ष घुस प्रकरणमा फरार भएका छन् । अध्यक्ष फरार भएको भोलिपल्ट स्थानीयले गाउँपालिकामा अध्यक्ष, प्रमुख प्रशासकीय अधिकृत र लेखा शाखामा ताल्चा लगाएपछि विकास निर्माणका काम ठप्प भएका छन् । गाउँपालिकामा कर्मचारी आफ्नो कक्षमा बसेपनि तीनवटा प्रमुखकै कार्यकक्षमा ताल्चा लगाइएका कारण गाउँपालिकाको कामकाज प्रभावित भएको हो ।

धनुषाको बटेश्वर गाउँपालिकाका अध्यक्ष डम्बरबहादुर राउत गएको फागुन १७ गते ८ लाख रुपैयाँ घुस रकम फालेर भागेपछि स्थानीयले फागुन १८ गतेबाट गाउँपालिका अध्यक्ष, प्रमुख प्रशाकीय अधिकृत र लेखा शाखामा ताल्चा लगाएका छन् । फरार गाउँपालिका अध्यक्ष राउतलाई पक्राउ गरी कारबाही गर्नुपर्ने, भएको विकासे कामको हरहिसाब पारदर्शी हुनुपर्नेलगायतका माग राखी राजनीतिक दल र नागरिक समाजका प्रतिनिधि आन्दोलित भएका छन् ।

१६ दिनदेखि फरार गाउापालिका अध्यक्ष राउत अहिलेसम्म सम्पर्कमा आएका छैनन् । उनलाई अख्तियारले समेत खोजी गरिरहेको छ । अध्यक्ष फरार भएपछि गाउँपालिकामा एक दिन पनि उपप्रमुख, प्रमुख प्रशासकीय अधिकृत र लेखापाल आएका छैनन् । कार्यालय बन्द हुादा पनि कर्मचारी कार्यालय जाने र बाहिरै हाजिरी गरेर फर्किने गरेका छन् । विकासे योजनाका कामसमेत ठप्प भएका छन् ।

ताल्चा खुलाउन गाउँपालिका उपप्रमुख प्रमिलादेवी महतो, निमित प्रमुख प्रशासकीय अधिकृत रुपनारायण यादव लगायतका जनप्रतिनिधिले कुनै चासो देखाएका छैनन् । ताल्चा खोलेर गाउँपालिकाको काम नियमित सुचारु गराउन धनुषाका प्रमुख जिल्ला अधिकारीसँग भएको छलफल पनि विना निष्कर्ष टुँगिएको छ ।

गाउँपालिका अध्यक्षले कार्यालयको भवन निर्माण योजनाको भुक्तानीको लागि सेवाग्राहीबाट धनुषाको महेन्द्रनगरमा ८ लाख रुपैयाँ घुस बुझेका थिए । अख्तियारको टोलीले पछ्याएको थाहा पाएपछि उनी गाउँपालिका कार्यालयकै गाडी चढेर भागेका थिए । भाग्ने क्रममा औरही खोलाको किनारमा लिएको ८ लाख रुपैँया घुस झाडीमा फालेका थिए भने चालकले तीव्र गतिमा गाडी चलाएर उनलाई बाटोबाटै भाग्न सघाएका थिए । अख्तियारको टोलीले गाडी र चालकलाई भने बटेश्वर बजारबाट नियन्त्रणमा लिएको थियो ।