• काठमाडौं । गएको २४ घण्टामा थप ५११ जनामा कोरोना संक्रमण देखिएको स्वास्थ्य तथा जनसंख्या मन्त्रालयले पुष्टि गरेको छ । जसमा २०४ जना महिला र ३०७ जना पुरुष रहेका छन् । त्यस्तै यस अवधिमा थप ७ जनाको मृत्यु भएको छ । यीसँगै नेपालमा बुधबारसम्म संक्रमित हुनेको संख्या २ लाख ६० हजार ५९ छ भने यसकै कारण ज्यान गुमाउने संख्या १ हजार ८४७ पुगेको विवरण मन्त्रालयले सार्वजनिक गरेको छ ।

    आज थपिने नयाँ संक्रमितमा काठमाडौं उपत्यकामा मात्रै ३१२ जना रहेका छन् । यीमध्ये काठमाडौंमा २२५, ललितपुरमा ४९ र भक्तपुरमा ३८ जना छन् ।

    त्यसैगरी बुधबार ६०० जना कोरोनामुक्त भई डिस्चार्ज भएका छन् । यसरी अहिलेसम्म निको हुनेको संख्या २ लाख ५१ हजार ९१२ पुगेको छ । मन्त्रालयका अनुसार हाल सक्रिय संक्रमितको संख्या ६ हजार ३०० रहेको छ । त्यस्तै कोरोनाको आशंकामा देशभरका क्वारेन्टाइनमा ३६२ जना रहेका छन् ।

    २४ घण्टामा ५ हजार ११० वटा नमूनाको पीसीआर परीक्षण भएको छ भने नेपालमा हालसम्म १९ लाख २६ हजार ४७७ पीसीआर परीक्षण भइसकेको मन्त्रालयले जनाएको छ ।