• काठमाडौं । २४ घण्टामा थप ३ हजार ११४ जनामा कोरोना भाइरस संक्रमण पुष्टि भएको स्वास्थ्य तथा जनसंख्या मन्त्रालयले जानकारी दिएको छ । यीसँगै नेपालमा कोरोना संक्रमितको संख्या लाख ७९ हजार ६१४ पुगेको छ । यस अवधिमा ११ हजार १६६ वटा नमूनाको पीसीआर परीक्षण भएका थिए ।

    आज थपिने नयाँ संक्रमितमा काठमाडौं उपत्यकाबाट मात्र १४ सय ६८ छन् । यसरी संक्रमित हुनेमा ६ सय ४९ महिला र ८ सय १९ पुरुष रहेको मन्त्रालयले बताएको छ । जसमा काठमाडौंमा १२ सय ४२, ललितपुरमा १ सय ६३ र भक्तपुरमा ६३ जना छन् ।

    मन्त्रालयले सार्वजनिक गरेको विवरण अनुसार मंगलबार ३ हजार १४२ जना कोरोनामुक्त भएका छन् । यसरी हालसम्म निको हुनेको संख्या १ लाख ४१ हजार १३४ संख्या पुगेको छ । त्यसैगरी आज थप २० जनाको कोरोना संक्रमणका कारण मृत्यु भएको मन्त्रालयले पुष्टि गरेको छ । मन्त्रालयको अद्यावधिक विवरण अनुसार नेपालमा कोरोनाकै कारण अहिलेसम्म मृत्यु हुनेको संख्या एक हजार ४ पुगेको हो ।

    बाँकी सक्रिय संक्रमितको संख्या देशभरी ३७ हजार ४७६ पुगेको छ भने हाल क्यारेन्टिनमा १ हजार २७७ जना बसिरहेका पनि मन्त्रालयले बताएको छ ।