काठमाडौं । फाइनान्स एन्ड इन्स्योरेन्स इन्टिच्युट अफ नेपाल (बिएफआइएन) र कोलम्बो प्लान स्टाफ कलेज (सिपिएससी)बीच बैंक तथा वित्तीय संस्थाका कर्मचारीको क्षमता अभिवृद्धि गर्न एक समझदारी पत्रमा हस्ताक्षर भएको छ । समझदारी पत्रमा बिएफआइएनका तर्फबाट प्रबन्ध निर्देशक डा. विनोद आत्रेय र सिपिएससीका तर्फबाट महानिर्देशक डा. रामहरि लामिछानेले हस्ताक्षर गरेका हुन् ।

आयोजनामा फिलिपिन्सको मनिलामा संचालन गरिएको बैंक तथा वित्तीय संस्थाका संचालकहरुको लागि ५ दिने एक्जुकेटिभ लिडरसिप डेभलपमेन्ट प्रोग्राम उद्घाटन समारोहमा उक्त समझदारी पत्रमा हस्ताक्षर भएको हो ।

उक्त समझदारी पत्रमा दुई संस्थाबीच समन्वय गरी तालिम, गोष्ठी तथा सेमिनार आयोजना गर्ने, बैंक तथा वित्तीय संस्थाका कर्मचारीको ज्ञान विकासका लागि संयुक्त रुपमा मान्यता प्राप्त शिक्षण संस्थासँग आबद्ध भई ३ महिने, ६ महिने तथा १ वर्षे कार्यक्रमहरु संचालन गर्ने लगायतका विषय समावेश छन् ।

डा. आत्रेयले उक्त समझदारीले नेपालको मानव संसाधन विकासको क्षेत्रमा उल्लेखनीय योगदान पुग्ने विश्वास रहेको बताए । यसैगरी अर्का हस्ताक्षरकर्ता डा. लामिछानेले बैंक तथा वित्तीय संस्थाका प्रतिष्ठित संचालकलाई स्वागत गरेका थिए ।

सो समारोहमा नेपालका प्रतिष्ठित वाणिज्य बैंक, विकास बैंक तथा लघुवित्त संस्थाका २५ जना संचालकको उपस्थिति रहेको थियो ।
कोलम्बो प्लान अन्तर्गत सन् १९७३ बाट एशिया प्यासिफिक राष्ट्रको प्राविधिक तथा व्यवसायिक शिक्षा प्रदान गर्दे आइरहेको संस्था हो। यस संस्थाले विभिन्न विषयमा तालिम तथा परामर्श सेवा समेत प्रदान गर्दै आइरहेको छ । फिलिपिन्सको मनिलामा एक कार्यक्रम बीच सो समझदारी भएको हो ।