-
संघीय मामिला तथा सामान्य प्रशासनमन्त्री लालबाबु पण्डितले कर्मचारी अभाव खेपिरहेको स्थानीय तहका लागि असार मसान्तसम्म १० हजार कर्मचारी पठाउने तयारी भइरहेको जानकारी दिएका छन् ।
स्थानीय सञ्चारकर्मीसंग कुराकानी गदै मन्त्री पण्डितले प्रशासनिक अन्तरिमकालीन अवस्था असार मसान्तसम्म चल्ने र त्यसपछिका दिनमा सबै स्थानीय तहले कर्मचारी अभाव खेप्नु नपर्ने दावी गरे ।
मन्त्री पण्डितले स्थानीय तहमा प्रशासनिक प्रमुख पठाउने काम पूरा भएको र अफिसर लेभलका कर्मचारी पनि ७५ प्रतिशत पूरा भएको जानकारी दिए । अब सहायक स्तरका कर्मचारी पनि असार मसान्तभित्र पठाइसकिने उनको भनाइ छ ।
स्थानीय तहमा तल्ला तहका कर्मचारी करारमा नियुक्ति गर्नेक्रममा जनप्रतिनिधिका आफ्नै छोरी, भाइ, जेठान भएको पाइएपछि तत्काललाई स्थानीय तहमा कर्मचारी नियुक्ति बन्द गरिएको उनले जानकारी दिए ।
उनले केन्द्रीय तहबाट हाललाई कर्मचारी व्यवस्थापन गर्ने र चाँडै प्रादेशिक लोकसेवा आयोगको व्यवस्था गरी प्रादेशिक लोकसेवा मार्फत राष्ट्रिय मापदण्ड अनुसारको राष्ट्रसेवकको नियुक्ति गरिने बताए ।
