काठमाडौ ।

गृह मन्त्रालयले एआइजीको दरबन्दी घटाउने निर्णय गरेसँगै प्रहरीमा पाँच जना एआइजी मात्र रहने भएको छ । पाँच जना एआइजी रहने गरी तयार पारिएको मस्यौदामा गृहमन्त्री रामबहादुर थापाले हस्ताक्षर गरेका छन् ।
उक्त मस्यौदालाई निर्णयका लागि अब मन्त्री परिषद्‌मा लगिनेछ। यसअघि नेपाल प्रहरीमा प्राविधिकसहित १६ जना एआइजी रहेका थिए। यसअघि भएका एआइजीमध्ये हाल प्राविधिकतर्फका एक जना मात्र कार्यरत छन् भने बाँकी अवकास पाइसकेका छन्। तर हालसम्म कति एआइजी रहने भन्ने टुंगो नलागेका कारण नयाँ बढुवा भएका छैनन्। संघीय प्रहरी ऐनको मस्यौदाका क्रममा नौ एआइजी राख्ने गृहकार्य भएको थियो तर बिहीबारको बैठकमा प्राविधिकसहित पाँच एआइजी मात्र राख्ने निर्णय भएको गृह मन्त्रालय स्रोतको भनाइ छ। त्यस्तै, गृह मन्त्रालयमा भएको बैठकमा सशस्त्र प्रहरीमा तीन एआइजी मात्र राख्ने सहमति जुटेको छ। हाल सशस्त्र प्रहरीमा आठ जना बहालवाला एआइजी छन्।