काठमाडौं । बुधबार उपत्यकाका २३ सहित २५५ जनामा कोरोना भाइरस संक्रमण पुष्टि भएको स्वास्थ्य तथा जनसंख्या मन्त्रालयले बताएको छ । जसमा उपत्यकाका काठमाडौँमा १६ र ललितपुरमा ७ जना छन् । थपिएको उक्त संख्यासँगै नेपालमा संक्रमितको संख्या १६ हजार ४२३ पुगेको मन्त्रालयका प्रवक्ता डा जागेश्वर गौतमले जानकारी दिएका छन् ।

प्रवक्ता डा. गौतमका अनुसार विगत २४ घण्टामा थप २५३ जना भाइरसमुक्त भएर डिस्चार्ज भएका छन् । यीसँगै हालसम्म ७ हजार ७५२ जना निको भएका छन् भने ३५ जनाको यसअघि नै मृत्यु भएको मन्त्रालयको तथ्यांकमा उल्लेख गरिएको छ । अहिले देशभरि आइसोलेशनमा ८ हजार ६३६ जनाको उपचार भइरहेको छ ।

मन्त्रालयका अनुसार पछिल्लो २४ घण्टामा ४ हजार ६९६ जनाको पीसीआर विधिबाट परीक्षण भएको थियो । यससँगै अहिलेसम्म पीसीआर विधिबाट २ लाख ६६ हजार ४५७ जनाको नमूना परीक्षणको भएको छ । त्यस्तै देशभरि क्वारन्टीनमा २५ हजार ४० जना रहेको मन्त्रालयले बताएको छ ।