काठमाडौँ । पछिल्लो २४ घण्टामा थप ३८० जनामा कोरोना भाइरस संक्रमण पुष्टि भएको स्वास्थ्य तथा जनसङ्ख्या मन्त्रालयले जनाएको छ । मन्त्रालयको नियमित मिडिया ब्रिफिङमा मन्त्रालयका प्रवक्ता डा. जागेश्वर गौतमले मंगलबार ३८० जनाको रिपोर्ट पोजिटिभ आएसँगै नेपालमा संक्रमितको संख्या ६ हजार पाँच सय ९१ पुगेको बताएका छन् । उनका अनुसार हालसम्म नेपालका ७३ जिल्लामा संक्रमण फैलिएको छ ।

प्रवक्ता गौतमका अनुसार कुल संक्रमितमध्ये विभिन्न कोरोना उपचार केन्द्रबाट थप ११७ जना डिस्चार्ज भएका छन् । त्यसमा पुरूष १०९ र महिला ८ जना रहेका छन् । योसँगै डिस्चार्ज हुनेको एक हजार १५८ पुगेको छ । यसअघि कोरोनाकै कारण १९ जनाको भने मृत्यु भइसकेको छ ।

मन्त्रालयका अनुसार विगत २४ घण्टामा ५ हजार ५५ जनाको पिसिआर परीक्षण भएको छ । अहिलेसम्म मुलुकभर एक लाख ४३ हजार ७ सय ३८ जनाको पीसीआर विधिबाट नमुना परीक्षण गरिसकिएको छ । हाल देशभर ५ हजार ५ सय ३१ जना आइसोलेसनमा रहेका छन् भने १ लाख ३३ हजार ९ जना क्वारेन्टिनमा बसेका छन् ।