काठमाडौँ । सोमबार अहिलेसम्मकै धेरै ४५१ जनामा कोरोना भाइरस सङ्क्रमण पुष्टि भएको स्वास्थ्य तथा जनसंख्या मन्त्रालयले जानकारी दिएको छ । नयाँ थपिने संक्रमितमा पुरूष ४१६ र महिला ३५ जना रहेका छन् । मन्त्रालयका प्रवक्ता डा. जागेश्वर गौतमले उक्त संख्यामा पोजिटिभ थपिएसँगै संक्रमितको संख्या ६ हजार २११ पुगेको जानकारी दिएका छन् ।

त्यसैगरी पछिल्लो २४ घण्टामा विभिन्न कोरोना उपचार केन्द्रबाट थप ६७ जना कोरोना जितेर निको भएका छन् । योसँगै कोरोना जित्नेको संख्या एक हजार ४१ पुगेको प्रवक्ता गौतमले बताए । कोरोनाकै कारण १९ जनाको भने मृत्यु भइसकेको छ ।

उनका अनुसार पछिल्लो २४ घण्टामा पीसीआर विधिबाट ५ हजार ३०६ वटा नमुनाको परीक्षण गरिएको थियो । हालसम्म १ लाख ३८ हजार ६८३ जनाको पीसीआर विधिबाट कोरोना भाइरसको परीक्षण भइसकेको छ ।

मन्त्रालयका अनुसार अहिले आइसोलेसनमा ५ हजार १५१ जनाको उपचार भइरहेको छ भने देशभरमा १ लाख ३३ हजार ८२९ जना क्वारेन्टिनमा बसेका छन् ।