काठमाडौँ । पछिल्लो चौबिस घण्टामा देशभरिबाट थप २१३ जनामा कोरोनाभाइरस संक्रमण पुष्टि भएको छ ।

स्वास्थ्य तथा जनसंख्या मन्त्रालयको नियमित पत्रकार सम्मेलनमा मन्त्रालयका प्रवक्ता डा. विकास देवकोटाले विभिन्न प्रयोगशालामा गरिएको परीक्षणका क्रममा देशभरबाट थप २१३ जनामा कोरोना संक्रमण पुष्टि भएको जानकारी दिएका हुन् । यीसँगै संक्रमितको संख्या ३४ सय ४८ पुगेको छ ।

मन्त्रालयका अनुसार हालसम्म ४६७ जना कोरोना जितेर घर फर्किएका छन् भने १३ जनाले ज्यान गुमाएका छन् ।

अहिलेसम्म पीसीआर विधिबाट देशभरि ९६ हजार २०५ परीक्षण भएको मन्त्रालयका प्रवक्ता देवकोटाले जानकारी दिए । उनले पछिल्लो २४ घण्टामा ३ हजार ७२८ परीक्षण गरिएको बताएका छन् ।

अहिले देशभरि १ लाख ७० हजार ७३२ भन्दा बढी व्यक्ति क्वारन्टीनमा रहेको मन्त्रालयले बताएको छ ।