काठमाडौँ । नेपालमा सोमबार नै फेरी थप १८ जनामा कोरोना संक्रमण पुष्टि भएको छ । योसँगै कोभिड–१९ बाट संक्रमित हुनेको कुल संख्या ३७५ पुगेको हो । यसअघि सोमबार नै ६३ जनामा कोरोना संक्रमण पुष्टि भएको थियो ।

राष्ट्रिय जनस्वास्थ्य प्रयोगशाला, टेकु, बिपी कोइराला स्वास्थ्य विज्ञान प्रतिष्ठान, धरान, भेरी अस्पताल नेपालगञ्ज तथा कोसी अस्पताल, विराटनगरमा गरिएको परीक्षणको पछिल्लो नतिजाअनुसार थप १८ जनामा कोरोना सङ्क्रमण पुष्टि भएको हो । थप सङ्क्रमितहरूमा धनुषा निवासी दुई पुरूष, खोटाङ हलेसी निवासी एक पुरुष, बाँके नरैनापुरका १२ जना पुरुष, दैलेख आठबीसका एक पुरुष, सुनसरीका एक पुरुष र झापाका एक पुरुषमा संक्रमण भेटिएको स्वास्थ्य मन्त्रालयका सहप्रवक्ता डाक्टर समिरकुमार अधिकारीले जानकारी दिएका छन् ।

सङ्क्रमितहरूको स्वास्थ्य अवस्था सामान्य रहेको मन्त्रालयले जनाइएको छ ।