मध्यपूर्वमा अहिले ५० हजारभन्दा धेरै अमेरिकी सेना तैनाथ भएका छन् । अमेरिकी राष्ट्रपति डोनाल्ड ट्रम्पले इरानमा एक महिनादेखि चलिरहेको युद्धमा अर्को कदम चाल्ने निर्णय गर्दा ५० हजारभन्दा धेरै सैनिक तैनाथ भएका ‘द न्यूयोर्क टाइम्स’ ले जनाएको छ ।

यो सङ्ख्या सामान्यभन्दा झन्डै १० हजारले धेरै हो । २० वर्षपछि पहिलो पटक मध्यपूर्व क्षेत्रमा ५० हजारभन्दा धेरै अमेरिकी सैनिक तैनाथ भएका खबरमा उल्लेख छ । बीबीसी र न्यूजनेसनका रिपोर्टहरूकाअनुसार झन्डै ३ हजार ५ सय नाविक र मरीनहरू भर्खरै ‘यूएसएस त्रिपोली’ पानीजहाजमार्फत यस क्षेत्रमा आइपुगेका छन् ।

‘यूएसएस त्रिपोली’ ले मरिन सैनिक, हेलिकोप्टर र एफ–३५बी जस्ता लडाकु विमान बोक्न सक्छ । अमेरिकी सेना बहराइन, कुवेत, कतार र साउदी अरेबियाका प्रमुखसहित कम्तीमा १९ ठाउँमा तैनाथ छन् ।

यसैबीच अमेरिकी राष्ट्रपति ट्रम्पले खार्ग टापु सजिलै कब्जा गर्न सक्ने दाबी गर्नुभएको छ । उहाँले इरानको तेल लिन खार्ग टापु कब्जा गर्न सक्ने बताउनुभएको हो । मध्यपूर्वमा तनाव कायमै रहँदा तेलको भाउ फेरि बढेको छ ।

तेलको भाउ बढेर प्रतिब्यारेल ११५ अमेरिकी डलरभन्दा माथि पुगेको छ । गएको फेब्रुअरी २८ तारिखअघि तेलको भाउ प्रतिब्यारेल ७२ डलरमा कारोबार भइरहेको थियो । तर अमेरिका र इजरायलले इरानमाथि आक्रमण थालेपछि तेलको भाउमा उतारचढाव भइरहेको छ ।