काठमाडौं : कार्यवाहक प्रमुख निर्वाचन आयुक्त रामप्रसाद भण्डारीले चुनावको मत सर्वेक्षण नतिजा सार्वजनिक गर्ने काम नगर्न सञ्चारमाध्यमहरूलाई आग्रह गरेका छन् ।

आज काठमाडौंमा आयोजित मतदाता शिक्षा एवम् चुनाव प्रचारप्रसारका लागि सामाजिक सञ्जालका लोकप्रिय सङ्घ–संस्था एवम् कलाकारहरूसँगको छलफलमा उनले चुनावअघि नै मत सर्वेक्षण गरी नतिजा सार्वजनिक गर्ने काम नगर्न आग्रह गरेका हुन्।

उनले प्रविधिको दुरुपयोगले चुनावको निष्पक्षतालाई नै धराशायी बनाउन सक्ने जोखिम भएकाले यसतर्फ गम्भीर बन्न सम्बन्धित सबैको ध्यानाकर्षण गराएका हुन् । उनले कृत्रिम बुद्धिमत्ता अर्थात्ए (एआई) को प्रयोग गरी सिर्जना गरिएका दिग्भ्रमित पार्ने सामग्री सामाजिक सञ्जालमा सम्प्रेषण नगर्न र नगराउन सहयोगी भूमिका निर्वाह गरिदिन पनि आमसञ्चारलगायतका सम्बन्धित पक्षसँग आग्रह गरे ।

निर्वाचन आचारसंहिताको पूर्ण पालना गर्ने कुरामा सबैले आफ्नो जिम्मेवारी सम्झेर काम गर्नुपर्ने पनि कार्यवाहक प्रमुख निर्वाचन आयुक्त भण्डारीको भनाइ छ ।

केही दिनयता नाम चलेका भनिएका अनलाईनहरुले फलानोले जित्ने भन्दै ठोकुवा गरेर समाचार प्रकाशन गरेसँगै उनको यो भनाई आएको हो । उक्त अनलाईन विरुद्ध सूचना विभागमा समेत उजुरी परेको भन्ने बुझिएको छ ।