अमेरिकाले आफ्नो सुरक्षा रणनीतिमा चीनलाई शीर्ष प्राथमिकताबाट हटाएको छ । यसअघि चीनले खडा गरेको खतरालाई शीर्ष प्राथमिकताका रूपमा मान्दै आएको अमेरिकाले सुरक्षा रणनीति परिवर्तन गर्दै मातृभूमि र पश्चिमी गोलार्धको सुरक्षालाई आफ्नो प्राथमिक चिन्ताको विषय मानेको हो ।

अमेरिकी रक्षा विभागको मुख्यालय पेन्टागनले अपनाएको नयाँ सुरक्षा रणनीतिमा रुस र उत्तर कोरियाबाट उत्पन्न खतराहरूको सामना गर्न अमेरिकी सहयोगीहरूलाई थप जिम्मेवारी बाँडफाँट गर्ने उल्लेख छ । उत्तर कोरियाबाट उत्पन्न खतराको सामना गर्न दक्षिण कोरियालाई थप जिम्मेवारी हस्तान्तरण गर्ने अमेरिकी लक्ष्य छ । झन्डै २८ हजार ५ सय अमेरिकी सेना तैनाथ रहेको दक्षिण कोरियाले यस वर्षका लागि आफ्नो रक्षा बजेट ७ दशमलव ५ प्रतिशतले बढाएको छ ।

यस्तै अमेरिकाले आफ्ना सहयोगीहरूलाई सीमित सहयोग प्रदान गर्ने भएको बीबीसीले जनाएको छ ।

अमेरिकाले पछिल्लो समय भेनेजुएलाका राष्ट्रपति निकोलस मादुरोलाई पक्राउ गरेको छ । पूर्वी प्रशान्त र क्यारेबियनमा लागुऔषध बोकेका डुङ्गाहरूमाथि आक्रमण गरेको छ । यस्तै ग्रीनल्यान्ड प्राप्त गर्न सहयोगीहरूलाई दबाब दिएको छ ।