अमेरिकी राष्ट्रपति डोनाल्ड ट्रम्पले भारतमाथि ५० प्रतिशत भन्सार कर लगाउने घोषणा गरेसँगै दुई देशबीचको सम्बन्ध चिसिएको छ । अमेरिका भित्रै भारतविरुद्ध ट्रम्पको नीतिप्रति असन्तुष्टि र चिन्ता व्यक्त भइरहेको बीबीसीले जनाएको छ ।

अमेरिकन रिपब्लिकन नेतृ निक्की हेलीले अमेरिकाले चीनलाई सन्तुलनमा राख्न भारत जस्तो मित्र राष्ट्रसँग सम्बन्ध बिगार्न नहुने तर्क गरेकी छिन् । व्यापार र तेलसम्बन्धी विवाद गम्भीर भए पनि साझा लक्ष्य चीनविरुद्धको रणनीति भएको उनको टिप्पणी छ ।

पूर्व अमेरिकी विदेशमन्त्री जोन केरीले ट्रम्पले आफ्ना नयाँ कर नीतिबाट मित्र राष्ट्रलाई टाढा पार्ने काम गरिरहेको आरोप लगाएका छन् । भारतसँगको तनाव दुर्भाग्यपूर्ण भन्दै उनले यसले गएको २५ वर्षको मेहनतलाई खतरामा पार्ने बताए ।

अमेरिकी मिडियाले पनि ट्रम्पको नीतिलाई कडा आलोचना गरेको छ । विश्लेषकहरूले अब भारतले आफ्नो कूटनीति सम्बन्ध परिवर्तन गर्नुपर्ने भन्दै चीन र रूससँगको सम्बन्ध फेरि सन्तुलनमा ल्याउनुपर्ने आवश्यकता देखिएको बताएका छन् ।

अमेरिकी राष्ट्रपति डोनाल्ड ट्रम्पले भारतमाथि पहिलो पटक अगस्ट ७ मा २५ प्रतिशत र दोस्रो पटक अगस्टमा २७ मा २५ प्रतिशत गरी कुल ५० प्रतिशत भन्सार कर घोषणा गरेका छन्। भारतले रूसबाट तेलको आयात गरिरहेको भन्दै अमेरिकाले भन्सार कर बढाएको हो ।