प्रजातान्त्रिक गणतन्त्र कङ्गोमा विद्रोही समूहले कम्तीमा १ सय ४० जना सर्वसाधारणको हत्या गरेको अधिकार समूहले जनाएको छ ।

विद्रोही समूह ‘एम– ट्वान्टी थ्री’ ले गएको महिना सर्वसाधारणको हत्या गरेको ‘ह्युमन राइट्स वाच’ (एचआरडब्ल्यू) को प्रतिवेदनलाई उद्धृत गर्दै बीबीसीले जनाएको छ । यस क्षेत्रको द्वन्द्व अन्त्य गर्न अमेरिका र कतारको मध्यस्थतामा भएको शान्ति प्रक्रियाको बाबजुद यो हत्या भएको हो ।

रुवाण्डा–समर्थित विद्रोहीले विरुङ्गा राष्ट्रिय निकुञ्ज नजिकैको रुत्शुरु क्षेत्रमा रहेको हुतु समूहका महिला र बालबालिकासहित स्थानीयवासीको हत्या गरेको प्रत्यक्षदर्शीहरूले बताएका खबरमा उल्लेख छ ।

गएको जनवरीमा विद्रोही समूहले क्षेत्रीय राजधानी गोमासहित खनिज सम्पन्न पूर्वका ठूला भागहरू कब्जा गरेपछि सरकारी सेनासँग लडाइँ बढेको छ ।

आज सार्वजनिक भएको प्रतिवेदनमा ‘ह्युमन राइट्स वाच’ ले गएको जुलाई १० देखि ३० को बीचमा विद्रोही समूह ‘एम– ट्वान्टी थ्री’ ले विरुङ्गा राष्ट्रिय निकुञ्ज नजिकैका कम्तीमा १४ गाउँ र कृषि क्षेत्रहरूमा मानिसहरूमाथि आक्रमण गर्न छुरा र बन्दुकको प्रयोग गरेको बताएको छ । विद्रोही समूहले मानिसहरूलाई बाहिर निस्कनबाट रोक्नका लागि क्षेत्रलाई घेरेर सबै सडकहरू बन्द गरेका थिए ।

गएको महिना कतारमा छुट्टाछुट्टै रूपमा विद्रोही समूह र कङ्गो सरकारले स्थायी शान्तितर्फको कदमका रूपमा युद्धविराम सम्झौतामा हस्ताक्षर गरेका थिए । तर गएको हप्ता वार्ता पुनः शुरू हुने तयारीमा रहेका बेला सरकारले सम्झौताको घोषणाहरू पूरा गर्न असफल भएको भन्दै विद्रोही समूह बाहिरिएको थियो ।

कङ्गोली सेनाले पनि विद्रोही समूह ‘एम– ट्वान्टी थ्री’ लाई युद्धविराम उल्लङ्घन गरेको आरोप लगाएको छ ।

यसैबीच ‘ह्युमन राइट्स वाच’ ले संयुक्त राष्ट्र सुरक्षा परिषद्, युरोपेली सङ्घ र सरकारहरूलाई कङ्गोमा देखिएका गम्भीर दुव्र्यवहारको निन्दा गर्न, जिम्मेवार व्यक्तिहरूमाथि थप प्रतिबन्ध लगाउन र द्वन्द्वमा संलग्न कमान्डरहरूलाई पक्राउ गर्न र उचित अभियोजनका लागि दबाव दिन आग्रह गरेको छ ।