काठमाडौं ।

बिराटनगरमा सञ्चारकर्मी सँग कुरा गर्दै संघीय मामिला तथा सामान्य प्रशासनमन्त्री लालबाबु पण्डितले कर्मचारीहरुलाई खटाएको काममा नगए कार्वाही गर्ने तयारी भएको वताएका छन् । अल्टिमेटम दिई सकिएको बताउँदै उनले अटेर गरे जागिर जाने बताएका छन् ।

उनले संघीयता कार्यान्वयनको घडीमा राष्ट्रसेवक कर्मचारीलाई विदाइको सट्टा काममा लगाउन आवश्यक भएको बताएका छन् । ‘स्वेच्छिक अवकाश अधिकार नभई सुविधा भएको बुझ्नु आवश्यक छ,’ उनले भने, ‘कर्मचारीहरुलाई खटाएको ठाउँमा जान अल्टिमेटम दिइसकेको छु, काममा नखटिने कर्मचारीलाई कानुन सम्मत ढङ्गले हटाउनेसम्मको कार्वाही हुन्छ ।’

कर्मचारीहरु खटिसकेपछि नयाँ संरचना अनुसार कर्मचारी समायोजनको प्रक्रिया शुरु गर्ने मन्त्री पण्डितले बताए । उनले सचिव सरुवा मन्त्री परिषद्को निर्णयले भएको भन्दै कसैले चित्त दुखाउन आवश्यक नभएको बताए । ‘मन्त्रालयहरुमा सचिवहरुको सरुवा क्याबिनेटको निर्णयले भएको छ,’ उनले भने, ‘सचिव सरुवाको अधिकार प्रधानमन्त्रीको भएकाले उहाँसँगै सल्लाह गरेर गरिएकोले यसमा कसैले चित दुखाई गर्नु हुँदैन ।’