काठमाडौं ।

नेपाली कर्मचारीले भारतमा सम्पत्ति शुद्धिकरण तथा आतंकवादी क्रियाकलापमा वित्तीय लगानी निवारणसम्बन्धी प्रशिक्षण लिएका छन् । नेपाल सरकारका १८ कर्मचारीलाई सोमबारदेखि भारतको बेंगलूरस्थित नेशनल एकेडेमी अफ कस्टम, इन्डाइरेक्स टेक्सस् एण्ड नार्कोटिस्मा उक्त प्रशिक्षण लिन सुरु गरेको हो। २० नेपाली अधिकारीहरुको पहिलो समूहले भदौ ७ गतेदेखि ६ दिने प्रशिक्षण लिएका थिए। २१ जना नेपाली अधिकारीको तेस्रो समूहले यहीँ मंसिर(पुस महिनादेखि प्रशिक्षण सुरु गर्नेछन्। वित्तीय अनुसन्धान एवम् सम्पत्ति शुद्धिकरण क्षेत्रमा एनएसीआईएन भारत सरकारको अत्याधुनिक शिक्षण सुविधा सहितको प्रमुख प्रशिक्षण संस्थान हो।
भारतीय दूतावासका अनुसार नेपाल सरकारको अनुरोधमा कूल ६० अधिकारीहरुको लागि तयार पारिएकोे यो एक विशेष कोर्ष हो। नेपाल सरकारका विभिन्‍न निकायहरुको क्षमतालाई अभिवृद्धि गर्ने भारत सरकारको प्रतिबद्धताको उदाहरणको रुपमा यस कार्यक्रमलाई लिइएको छ। भारत सरकारको पूर्ण सहयोग रहेको सो कोर्ष भारतीय विदेश मन्त्रालयको प्राविधिक तथा आर्थिक सहयोग कार्यक्रम अन्तर्गत रहेको छ। प्रशिक्षणले नेपाली कर्मचारीको सम्पत्ति शुद्धिकरण तथा आतङ्कवादी क्रियाकलापमा वित्तीय लगानी निवारण सम्बन्धी मामिलाहरुलाई प्रभावकारी ढङ्गबाट सामना गर्न सक्ने क्षमतालाई अभिवृद्धि गर्ने बताइएको छ।