काठमाडौं ।

सांसदहरु कर्मचारीप्रति निक्कै आक्रामक बनेका छन् । उनीहरुले मन्त्रालयका सचिवहरुप्रतिनै कार्यक्षमता अभाव भएको बताएका छन् । सांसद रामकुमारी झाँक्रीले मन्त्रालयका सचिवहरु कामकाजी नभएको आरोप लगाईन् । राज्य व्यवस्था तथा सुशासन समितिको बैठकमा
सासदहरु आक्रमक रुपमा प्रस्तुत भएका थिए । ‘संघीय निजामती सेवाको गठन, संचालन र सेवाको सर्तसम्बन्धमा व्यवस्था गर्न बनेको विधेयक’माथिको छलफलमा भाग लिँदै उनीहरुले मन्त्रालयको सचिवहरुको कार्य क्षमता, कुशलता, समन्वयमा अभाव देखाए । सचिवमा बढुवा हुन कम्तिमा पनि अधिकृत भएको २५ वर्ष पुग्नै पर्ने कानुनी व्यवस्था गर्न पनि सरकारसँग माग गरिन्। भारतमा अधिकृत भएको ३३ वर्ष पछि मात्रै सचिव हुने प्रावधान राखिएको उल्लेख गर्दै नेपालमा पनि सचिव हुन अधिकृत भएको कम्तिमा २५ वर्ष हुनैपर्ने कानुनी व्यवस्था गर्नुपर्ने उनीहरुको तर्क छ । सांसद झाँक्रीले अधिकृत भएको केही वर्षमै सचिव हुने भएका कारण पनि सचिवहरुमा कार्य कुशलताको अभाव देखिएको दावी गरिन्। सांसद विमला विश्वकर्माले बन्द(हडतालमा उत्र्ने कर्मचारीलाई पदबाटै हटाउने कानुनी व्यवस्था गर्नुपर्ने प्रस्ताव अघि सारिन् । जनताको सेवामा केन्द्रित हुनुपर्ने कर्मचारीहरु विगतमा पनि बन्द(हडतालमा सहभागी हुने गरेको बताउँदै उनले अब त्यसो गरे कडा कारवाही गर्ने व्यवस्था हुनुपर्नेमा जोड दिइन्। समितिका अर्का सदस्य एवम् पूर्व स्वास्थ्य मन्त्री खगराज अधिकारीले भने चिकित्सकहरुलाई जथाभावी सरुवा नगर्न सरकारलाई सचेत गराए।