राजविराजस्थित सिँचाई कार्यालयमा आएका दुई मेयरलाई प्रहरीले धक्का दिएर वाहिर निकालेको छ । कार्यालय प्रमुखको कार्यकक्षमा तालाबन्दी गर्न खोजेपछि जनप्रतिनिधिलाई प्रहरीले धक्का दिएको हो ।
आफनो नगरपालिका क्षेत्रभित्र संचालन भइरहेको योजनाका विषयमा कार्यालयले जानकारी नदिएको र योजनाको विवरण माग गर्दा पनि उपलब्ध नगराएको जनप्रनितिनिधिले गुनासो गरे।
डिभिजन प्रमुखले मनोमानी गरेको आरोप लगाउँदै बोदेबरसाईन नगरपालिकाका मेयर आतिसकुमार सिंह यादव र खडक नगरपालिकाका मेयर हेमायु हकसहित वडाअध्यक्ष लगायतका जनप्रतिनिधि जलश्रोत तथा सिँचाई विकास डिभिजन कार्यालयमा तालाबन्दी गर्न पुगेका थिए। प्रहरीको धक्कामुक्की र अवरोधपछि जनप्रतिनिधिहरू फर्केका छन्।

संघीय सरकार तथा प्रदेश सरकारले सिँचाई तथा नदी नियन्त्रणका लागि छुट्याएको बजेटमा डिभिजन कार्यालयले मनोमानी गरेको मेयर आतिशले बताए। खडक र बिहुल नदी नियन्त्रणका लागि ४÷४ करोड बजेट आएको जानकारीमा आएपनि त्यो विषय गुपचुपमै राखेर डिभिजन प्रमुखले भ्रष्टाचारको नाङ्गो नाच देखाईरहेको उनको आरोप छ।

-तस्वीर, नेपाललाईभ